संस्कारांचा कित्ता

आजच्या प्रवाहात ओंडक्यासारखे वाहून चालणार नाही

संस्कारांचा कित्ता आपला तसाच गिरवून भागणार नाही |

नेहमी खरे बोलायचे शिकला असाल  

पण आजच्या जगाला ते पटणार नाही

किरकोळ खोटे तरी बोलायला हवे

त्याशिवाय हक्कच काय पण जीवसुद्धा वाचणार नाही |

आज्ञा पाळणे हेच कर्तव्य मानले असाल  

पण सोबतच्या माणसांनाच आज ते रुचणार नाही

काही आज्ञांना कानी पडूच द्यायचे नसते

असे नाही केले तर तुमचे अस्तित्वही कुणी जाणणार नाही |

'इथे तिथे' न पाहता नाकासमोर चालला असाल

नुसते सरळ चालून हा रस्ता कधी संपणार नाही

ज्याच्या समोर जातोय ते नाकही कधी खुपसावे लागते

त्याशिवाय ज्या गावी जायचेय ते नजरेसही पडणार नाही |

स्वतःलाही विसरून मदत करत हिंडला असाल

म्हणाल असे हिंडताना काटे कधी रुतणार नाही

पण काटा लागेल तेव्हा फक्त स्वतःचीच फुंकर असेल

कुणीच नसेल आजूबाजूस वा असूनही कुणी येणार नाही |

आजच्या प्रवाहात ओंडक्यासारखे वाहून चालणार नाही

संस्कारांचा कित्ता आपला तसाच गिरवून भागणार नाही |

- नम्रता